Hartwig von Rute (12. Jahrhundert)


Mir tuot ein sorge wê in mînem muote,
die ich hin hein ze lieben friunden hân
obs iender dâ gedenken mîn ze guote
als ich ir hie mit triuwen hân getân.
si solte mich durch got geniezen lân
daz ich ie bin gewesen in grôzer huote
dazs iemer kunne valsch an mir verstân.
Swer wænet daz mîn trûren habe ein ende,
dern weiz niht waz mir an dem herzen lît:
ein kumber den mir niemen kan erwenden,
ez tæte danne ir minneclîcher lîp.
die sorge hân ich leider âne strît
sine welle mir ir boten senden,
dem ich verwartet hân vor maneger zît.
Swie mir der tôt vast ûf dem rugge wære
unde dar zuo manic ungemach,
sô wart mîn wille nie deich si verbære,
swie nâhen ich den tôt bî mir gesach.
dâ manic man der sünden sîn verjach,
dô was daz mîn aller meistiu swære
daz mir genâde nie von ir geschach.


Ich sihe wol daz dem keiser und den wîben
mit ein ander niemen dienen mac.
des wil ich in mit sælden lân belîben:
er hât mich zin versûmet manegen tac.


Ich bin gebunden
ze allen stunden
als ein man
der niht kan
gebâren nâch dem willen sîn.
daz mac si gebüezen diu mich twinget
daz mîn munt singet
manegen swæren tac:
wan ich enmac
niht geruowen, ich enkome ir nâhe bî
sô daz ich ir gesagen müeze waz mîn wille sî.
daz eine mac mir sorge wenden,
si kan mit leide ane vân und mit vröuden enden.


Ich wil versuochen
ob si geruochen
welle daz ich sinne
nâch ir minne
langer danne ich hân gelân. enpfâhet siz ze guote,
sô stîgt mîn fröude gegen der wunneclîcher zît
und wirt mir sô wol ze muote
daz ez wunder wære
obe mîn herze daz verbære
daz ez von vröuden zuo den himelen niht ensprunge
und von sô süezer handelunge
ein hôhez niuwez liet in süezer wîse sunge.


Als ich sihe daz beste wîp,
wie kûme ich daz verbir
daz ich niht umbevâhe ir reinen lîp
und twinge si ze mir.
ich slân dicke ze sprúnge als ich welle dar
sô si mir sô suoze vor gestêt.
næme sîn al diu werlt war,
sô mich der minnende unsin ane gêt,
ich möhte sîn niht verlân,
der sprunc wurde getân,
tríut ich bî ír einer húlde durch disen unsin bestân.


Inhalt home